حمزہ شیراز نے ڈبلیو بی او سپر مڈل ویٹ کا عالمی ٹائٹل جیت لیا؛ خطرناک لیفٹ ہک نے رنگ میں حریف کو بے بس کر دیا، عالمی باکسنگ کی دنیا میں ایک نیا ستارہ طلوع
اسپورٹس ڈیسک | 25 مئی 2026
پاکستانی نژاد برطانوی باکسر حمزہ شیراز نے ایک شاندار اور تاریخی مقابلے میں عالمی چیمپئن بن کر پاکستان کا نام پوری دنیا میں روشن کر دیا ہے۔ بیجنگ کے بعد باکسنگ رنگ میں بھی پاکستانی نژاد کھلاڑی کا طوطی بولنے لگا ہے، جہاں 26 سالہ حمزہ شیراز نے جرمنی کے ایلم بیگچ کو یکطرفہ مقابلے کے بعد دوسرے ہی راؤنڈ میں ناک آؤٹ کر کے ڈبلیو بی او (WBO) سپر مڈل ویٹ کا عالمی ٹائٹل اپنے نام کر لیا۔
یہ مقابلہ شروع ہوتے ہی حمزہ شیراز نے جارحانہ حکمت عملی اپنائی اور اپنے حریف کو سنبھلنے کا کوئی موقع نہیں دیا۔ ان کے درست اور تابڑ توڑ پنچز نے جرمن باکسر کو شروع سے ہی دباؤ میں رکھا، جس کے بعد دوسرے راؤنڈ میں حمزہ کے ایک خطرناک ‘لیفٹ ہک’ نے ایلم بیگچ کو رنگ میں ڈھیر کر دیا اور وہ سنبھل نہ سکے۔ ریفری نے مقابلہ فوری طور پر روکتے ہوئے حمزہ شیراز کو فاتح قرار دیا۔
حمزہ شیراز نے یہ تاریخی بیلٹ ریٹائرڈ باکسر ٹیرنس کرافورڈ کی خالی کردہ نشست پر جیتی ہے۔ فتح کے بعد حمزہ شیراز نے رنگ میں ہی سجدہ شکر ادا کیا اور اپنی ٹیم کے ہمراہ کامیابی کا جشن منایا۔ میڈیا سے گفتگو کرتے ہوئے حمزہ شیراز کا کہنا تھا کہ یہ مقابلہ ان کے لیے توقع سے زیادہ آسان رہا کیونکہ پہلے پنچ کے بعد ہی حریف مکمل طور پر ان کے دباؤ میں آ گیا تھا۔ انہوں نے بلند حوصلے کے ساتھ اعلان کیا کہ اب وہ 168 پاؤنڈ کیٹیگری کے تمام عالمی باکسرز کا سامنا کرنے کے لیے پوری طرح تیار ہیں۔
حمزہ شیراز اس سے قبل ستمبر 2024 میں ٹائلر ڈینی کو شکست دے کر یورپی مڈل ویٹ ٹائٹل بھی اپنے نام کر چکے ہیں، جس کے بعد سے ان کی کامیابیوں کا سفر جاری ہے۔ سوشل میڈیا پر پاکستانی شائقین اور کھیلوں کے ماہرین نے حمزہ شیراز کی اس کامیابی کو پاکستان کے لیے ایک بہت بڑا اعزاز قرار دیا ہے اور انہیں باکسنگ کی دنیا کا مستقبل کا بڑا نام قرار دے رہے ہیں۔ اس جیت کے ساتھ ہی حمزہ شیراز نے ثابت کر دیا ہے کہ وہ آنے والے وقت میں مزید کئی عالمی ٹائٹلز اپنے نام کرنے کی بھرپور صلاحیت رکھتے ہیں۔
