کراچی: کراچی میں چین کے قائم مقام قونصل جنرل فینگ ڈی ہینگ نے کہا ہے کہ چین اور پاکستان گزشتہ 75 برسوں سے ہر مشکل اور آزمائش میں ایک دوسرے کے ساتھ کھڑے رہے ہیں، جس کے نتیجے میں دونوں ممالک کے درمیان ناقابلِ شکست اور گہری دوستی قائم ہوئی ہے۔
چینی قونصلیٹ جنرل کراچی میں 110 جدید فوگنگ مشینیں، جن کی مالیت 17 لاکھ روپے ہے، کراچی میٹروپولیٹن کارپوریشن (کے ایم سی) کے حوالے کرنے کی تقریب سے خطاب کرتے ہوئے قائم مقام قونصل جنرل نے کراچی کے میئر بیرسٹر مرتضیٰ وہاب کا خیرمقدم کیا اور چینی فریق کے ساتھ طویل عرصے سے تعاون اور حمایت پر کے ایم سی اور میئر کراچی کو سراہا۔
فینگ ڈی ہینگ نے کہا کہ 2026ء چین اور پاکستان کے درمیان سفارتی تعلقات کے قیام کی 75ویں سالگرہ کا سال ہے۔ دونوں ممالک کی دوستی نے عالمی منظرنامے میں آنے والی مختلف تبدیلیوں کا مقابلہ کرتے ہوئے بین الریاستی تعلقات کے لیے ایک مثالی معیار قائم کیا ہے۔
انہوں نے کہا کہ دونوں ممالک کی قیادت چین اور پاکستان کی ’’آہنی دوستی‘‘ کو مزید مضبوط بنانے کو انتہائی اہمیت دیتی ہے۔ انہوں نے رواں سال مئی میں چینی صدر شی جن پنگ اور وزیراعظم شہباز شریف کے درمیان ملاقات کا حوالہ دیتے ہوئے کہا کہ دونوں ممالک نے مشترکہ مستقبل کے حامل چین پاکستان کمیونٹی کی تعمیر میں ٹھوس پیش رفت کرنے اور بڑے منصوبوں کے ساتھ ساتھ ایسے ’’چھوٹے مگر خوبصورت‘‘ عوامی فلاحی اقدامات کو فروغ دینے پر اتفاق کیا ہے جن سے دونوں ممالک کے عوام کو مزید فوائد حاصل ہوں۔
چینی قائم مقام قونصل جنرل نے چین پاکستان تعلقات میں کراچی کی اہمیت کو اجاگر کرتے ہوئے کہا کہ کراچی پاکستان کا معاشی، مالیاتی اور ثقافتی مرکز ہونے کے ساتھ ساتھ دونوں ممالک کی دوستی کے لیے ایک اہم پل بھی ہے۔
انہوں نے یاد دلایا کہ کراچی اور شنگھائی کے درمیان 1984ء میں دوست شہروں کے تعلقات قائم ہوئے تھے اور اس کے بعد سے دونوں شہروں نے شہری ترقی، ٹرانسپورٹ منصوبہ بندی اور ثقافتی تبادلوں سمیت مختلف شعبوں میں تعاون کیا ہے۔
فینگ ڈی ہینگ نے کہا کہ کراچی چین پاکستان اقتصادی راہداری (سی پیک) کے منصوبوں کے حوالے سے بھی اہم ترین علاقوں میں شامل ہے، جہاں توانائی کے تحفظ، رابطوں اور سرمایہ کاری کے مواقع پیدا کرنے والے متعدد اہم منصوبے جاری رہے ہیں۔
انہوں نے پورٹ قاسم کول پاور پلانٹ، تھر کول مائن اینڈ پاور انٹیگریشن پراجیکٹ، پشاور کراچی موٹروے کے سکھر ملتان سیکشن اور دھابیجی اسپیشل اکنامک زون کو چین پاکستان تعاون کی نمایاں مثالیں قرار دیا، جن سے کراچی اور وسیع تر خطے کو فائدہ پہنچ رہا ہے۔
قائم مقام قونصل جنرل نے چین پاکستان سفارتی تعلقات کی 75ویں سالگرہ کی تقریبات کے حوالے سے میئر کراچی بیرسٹر مرتضیٰ وہاب کے تعاون کو بھی سراہا۔ انہوں نے کہا کہ 21 مئی کو کے ایم سی بلڈنگ سمیت کراچی کی اہم تاریخی عمارتوں کو ’’چینی سرخ‘‘ رنگ سے روشن کیا گیا، جو دونوں ممالک کی دیرینہ دوستی کی عکاسی کرتا ہے۔
انہوں نے کہا کہ کراچی کی جانب سے اس اقدام پر چینی فریق انتہائی متاثر ہوا اور اسے دونوں ممالک کے درمیان مضبوط دوستی کا عملی اظہار قرار دیا۔
تقریب کے دوران چینی قونصلیٹ جنرل نے کراچی میٹروپولیٹن کارپوریشن کو 110 جدید پروفیشنل فوگر مشینیں عطیہ کیں تاکہ مون سون اور بارشوں کے موسم کے دوران شہر میں جراثیم کش اسپرے اور وبائی امراض سے بچاؤ کی سرگرمیوں کو مزید مؤثر بنایا جاسکے۔
فینگ ڈی ہینگ نے کہا کہ کراچی میں بارشوں کے موسم کے دوران موسمی اور متعدی بیماریوں کے پھیلاؤ کے خطرات میں اضافہ ہوجاتا ہے، ایسے میں عطیہ کی جانے والی جدید مشینیں شہر کی صحت عامہ کے نظام اور جراثیم کش اسپرے کی صلاحیت کو مضبوط بنانے میں مددگار ثابت ہوں گی۔
انہوں نے کہا کہ چین کراچی میں صحت کی سہولیات کی ترقی کو بہت اہمیت دیتا ہے اور شہر کے عوام کی صحت اور فلاح و بہبود کے لیے فکرمند ہے۔
ان کا کہنا تھا کہ یہ عطیہ ایک عملی عوامی فلاحی اقدام ہے جو چین اور پاکستان کے درمیان آہنی دوستی، باہمی تعاون اور ایک دوسرے کی حمایت کی عکاسی کرتا ہے۔ انہوں نے امید ظاہر کی کہ یہ مشینیں کراچی میں بیماریوں کے خطرات کو کم کرنے میں مؤثر کردار ادا کریں گی۔
قائم مقام قونصل جنرل نے اس عزم کا بھی اظہار کیا کہ چینی قونصلیٹ جنرل اپنے قونصلر ضلع میں عوامی سطح پر تعاون کو مزید فروغ دیتا رہے گا اور مقامی آبادی کے فائدے کے لیے عملی فلاحی اقدامات جاری رکھے گا۔
انہوں نے کہا کہ چین پاکستان کے ساتھ مل کر دونوں ممالک کی روایتی دوستی کو مزید آگے بڑھانے اور نئے دور میں مشترکہ مستقبل کے حامل مزید قریبی چین پاکستان کمیونٹی کی تعمیر کے لیے کام جاری رکھے گا۔
تقریب سے خطاب کرتے ہوئے میئر کراچی بیرسٹر مرتضیٰ وہاب نے قائم مقام چینی قونصل جنرل اور عوامی جمہوریہ چین کا 110 جدید فوگنگ مشینیں عطیہ کرنے پر شکریہ ادا کیا۔ انہوں نے کہا کہ مون سون سے قبل فراہم کی جانے والی یہ مشینیں شہر بھر میں جراثیم کش اسپرے کے لیے استعمال کی جائیں گی، جس سے بارشوں کے موسم میں شہریوں کو وبائی اور موسمی بیماریوں سے محفوظ رکھنے میں مدد ملے گی۔
