کراچی (ویب ڈیسک) 11 جون 2026
کراچی میں شدید گرم اور مرطوب موسم کا سلسلہ بدستور برقرار ہے جس نے معمولاتِ زندگی کو بری طرح متاثر کر رکھا ہے۔ محکمہ موسمیات کی جانب سے جاری تازہ ترین رپورٹ کے مطابق شہر کا درجہ حرارت آج 41 ڈگری سینٹی گریڈ تک پہنچ سکتا ہے جبکہ ہوا میں نمی کا زیادہ تناسب حبس کی شدت کو مزید بڑھا رہا ہے۔
آج شہر کا کم سے کم درجہ حرارت 30.3 ڈگری سینٹی گریڈ ریکارڈ کیا گیا ہے اور ہوا میں نمی کا تناسب 79 فیصد تک موجود ہے۔ جنوب مغرب کی سمت سے 22 کلو میٹر فی گھنٹہ کی رفتار سے ہوائیں چل رہی ہیں تاہم ہواؤں کی سمت میں مغربی رخ کی تبدیلی گرمی کی شدت میں مزید اضافے کا باعث بن سکتی ہے۔
محکمہ موسمیات نے 13 جون تک کے لیے ہیٹ ویو الرٹ جاری کر رکھا ہے۔ رپورٹ کے مطابق کراچی سمیت سندھ کے بیشتر اضلاع میں آئندہ 3 روز تک شدید گرم اور مرطوب موسم برقرار رہے گا۔ میدانی علاقوں میں چند مقامات پر گرد آلود ہوائیں چلنے کے ساتھ ساتھ بعض علاقوں میں گرج چمک کے ساتھ ہلکی بارش کا بھی امکان ظاہر کیا گیا ہے۔ سندھ کے اکثر اضلاع میں 12 جون تک درمیانی سے شدید ہیٹ ویو کی صورتحال رہنے کی پیشگوئی کی گئی ہے۔
شدید گرمی کی لہر کے پیشِ نظر ماہرینِ صحت اور محکمہ موسمیات نے شہریوں کو دوپہر کے اوقات میں براہِ راست دھوپ میں نکلنے سے گریز کرنے کی ہدایت کی ہے۔ عوام کو مشورہ دیا گیا ہے کہ پانی اور دیگر مشروبات کا زیادہ سے زیادہ استعمال کریں، ہلکے اور کھلے کپڑے پہنیں اور دھوپ میں نکلتے وقت سر کو ڈھانپ کر رکھیں۔ بزرگوں، بچوں اور مریضوں کی خصوصی دیکھ بھال کرنے اور انہیں ٹھنڈے ماحول میں رکھنے پر بھی زور دیا گیا ہے۔
