وفاقی دارالحکومت اسلام آباد اور راولپنڈی میں رات گئے سے جاری شدید اور موسلا دھار بارش کے باعث نالہ لئی میں طغیانی آگئی ہے اور پانی کی سطح خطرناک حد تک بلند ہو گئی ہے۔ فلڈ کنٹرول روم کے تازہ ترین اعداد و شمار کے مطابق کٹاریاں کے مقام پر پانی کا بہاؤ 21.5 فٹ اور گوالمنڈی کے مقام پر 16 فٹ تک پہنچ چکا ہے، جس کے بعد نالہ لئی کے اطراف واقع تمام نشیبی بستیوں میں ایمرجنسی وارننگ اور خطرے کے سائرن بجا دیے گئے ہیں۔ ضلعی انتظامیہ نے کسی بھی ناخوشگوار صورتحال سے بچنے کے لیے متاثرہ علاقوں کے مکینوں کو فوری انخلا اور محفوظ مقامات پر منتقل ہونے کی باضابطہ ہدایات جاری کر دی ہیں۔
محکمہ موسمیات اور کنٹرول روم کے مطابق جڑواں شہروں کے مختلف علاقوں میں ریکارڈ بارش درج کی گئی ہے، جس میں سید پور کے مقام پر 66 ملی میٹر، بوکڑہ میں 65، پی ایم ڈی میں 58، پیر ودھائی میں 58، گولڑہ میں 52، نیو کٹاریاں میں 52، شمس آباد میں 48 اور کچہری میں 47 ملی میٹر بارش ریکارڈ ہوئی۔ وقفے کے بعد صبح دوبارہ شروع ہونے والی بارش کے نتیجے میں ندی نالوں میں پانی کے دباؤ میں مسلسل اضافہ ہو رہا ہے، جس کی وجہ سے کٹاریاں کے قریبی علاقوں میں ریڈ الرٹ جبکہ گوالمنڈی کے نشیبی حصوں میں پری الرٹ نافذ کر دیا گیا ہے۔
صورتحال کی سنگینی کو دیکھتے ہوئے ریسکیو 1122، واسا، بلدیاتی اداروں اور ضلعی انتظامیہ کے تمام عملے کو ہائی الرٹ پر رکھا گیا ہے اور نشیبی علاقوں سے نکاسی آب کے لیے ہیوی مشینری و ڈی واٹرنگ سیٹس فیلڈ میں پہنچا دیے گئے ہیں۔ انتظامیہ نے شہریوں سے اپیل کی ہے کہ وہ ندی نالوں کے قریب غیر ضروری نقل و حرکت سے گریز کریں، بجلی کی تنصیبات سے دور رہیں اور ہنگامی صورت میں فوری طور پر ہیلپ لائن پر رابطہ کریں۔
