سندھ کے تاریخی شہر سکھر اور اس کے گرد و نواح میں گرج چمک اور تیز طوفانی آندھی کے ساتھ ہونے والی مونسون بارش نے جہاں طویل عرصے سے جاری شدید گرمی اور حبس کا زور توڑ کر موسم کو خوشگوار بنا دیا، وہاں دوسری جانب تیز ہواؤں نے شہر کے بجلی اور مواصلاتی نظام کو شدید نقصان پہنچایا ہے۔ بارش کے آغاز کے ساتھ ہی سکھر الیکٹرک پاور کمپنی (سیپکو) کے 70 سے زائد فیڈرز یکدم ٹرپ کر گئے، جس کے نتیجے میں شہر کے متعدد اہم تجارتی اور رہائشی علاقے بجلی کی فراہمی سے مکمل طور پر محروم ہو گئے اور پورا شہر تاریکی میں ڈوب گیا۔ اچانک بجلی کی معطلی سے شہریوں کو شدید مشکلات کا سامنا کرنا پڑا۔
بارش کے باعث سکھر کے نشیبی علاقوں، گلیوں اور مرکزی سڑکوں پر پانی جمع ہو گیا، جس سے ٹریفک کی روانی اور پیدل چلنے والوں کی آمدورفت میں شدید رکاوٹیں پیدا ہوئیں۔ کئی مقامات پر سیوریج کا نظام مفلوج ہونے کی وجہ سے سڑکوں نے ندی نالوں کا منظر پیش کیا، جس پر شہریوں نے انتظامیہ کی ناقص کارکردگی پر شدید تحفظات کا اظہار کیا۔ تاہم، اس تمام تبا کاری کے باوجود تیز آندھی اور گرج چمک کے بعد درجہ حرارت میں نمایاں کمی ریکارڈ کی گئی، جس سے حبس کے مارے شہریوں نے سکھ کا سانس لیا اور بارش کے دلکش موسم کا لطف اٹھانے کے لیے گھروں سے باہر نکل آئے اور موسم کو انجوائے کیا۔
سیپکو اور بلدیاتی انتظامیہ کے ذرائع کے مطابق بجلی کی جلد بحالی اور سڑکوں پر جمع شدہ پانی کی نکاسی کے لیے ہنگامی بنیادوں پر امدادی ٹیمیں اور آپریشن شروع کر دیا گیا ہے۔ حکام کا کہنا ہے کہ ٹیمیں متاثرہ فیڈرز کو درست کرنے اور شہر میں بجلی کا نظام بحال کرنے کی کوشش کر رہی ہیں تاکہ شہریوں کو جلد از جلد معمول کی زندگی کی طرف لایا جا سکے۔ مقامی انتظامیہ نے شہریوں کو ہدایت کی ہے کہ وہ بارش کے دوران کھمبوں اور بجلی کی تاروں سے دور رہیں اور ناگہانی حادثات سے بچنے کے لیے احتیاطی تدابیر اختیار کریں۔
