تمغۂ امتیاز کے 20 سال بعد ایک اور قومی اعزاز؛ گلوکارہ نے اپنی کامیابی مداحوں اور اہل خانہ کے نام کر دی
ویب ڈیسک 15 مئی 2026
پاکستان کی معروف گلوکارہ اور شوبز انڈسٹری کی معتبر شخصیت حدیقہ کیانی کو موسیقی کے میدان میں ان کی دہائیوں پر محیط شاندار خدمات کے اعتراف میں ‘ستارۂ امتیاز’ سے نواز دیا گیا ہے۔ لاہور کے گورنر ہاؤس میں منعقدہ ایک باوقار تقریب میں گورنر پنجاب سردار سلیم حیدر نے صدرِ پاکستان کی جانب سے انہیں یہ اعلیٰ ترین سول اعزاز پیش کیا۔ اس تقریب میں زندگی کے مختلف شعبوں میں نمایاں کارکردگی دکھانے والی دیگر اہم شخصیات کو بھی قومی اعزازات سے نوازا گیا۔
حدیقہ کیانی نے اس اعزاز کو اپنے فنی سفر کا ایک جذباتی اور یادگار لمحہ قرار دیتے ہوئے سوشل میڈیا پر اپنی خوشی کا اظہار کیا۔ انہوں نے انسٹاگرام پر تقریب کی تصاویر شیئر کرتے ہوئے لکھا کہ بیس سال قبل ‘تمغۂ امتیاز’ حاصل کرنے کے بعد آج ‘ستارۂ امتیاز’ وصول کرنا ان کے لیے ایک ناقابلِ یقین اعزاز ہے۔ انہوں نے ایک دلچسپ مشاہدہ بھی شیئر کیا کہ دو دہائیاں قبل جب انہیں تمغۂ امتیاز ملا تھا تب بھی انہوں نے سرخ لباس زیب تن کیا تھا اور آج اس تاریخی موقع پر بھی وہ سرخ لباس میں ہی جلوہ گر ہوئیں۔
گلوکارہ نے اپنی اس کامیابی کا سہرا اپنے بیٹے، خاندان اور مداحوں کے سر باندھتے ہوئے کہا کہ ان کے چاہنے والوں کی مسلسل حمایت اور محبت ہی ان کے سفر کی اصل طاقت ہے۔ حدیقہ کیانی، جنہوں نے پاپ سے لے کر صوفیانہ کلام تک موسیقی کی ہر صنف میں اپنا لوہا منوایا ہے، اب بھی اپنے فن کے ذریعے پاکستان کا نام روشن کرنے میں مصروف ہیں۔ ستارۂ امتیاز ملنے پر شوبز سے وابستہ ساتھی فنکاروں اور مداحوں کی جانب سے انہیں مبارکباد دینے کا سلسلہ جاری ہے اور اسے ان کے متاثر کن کیریئر کا ایک اور تابناک سنگِ میل قرار دیا جا رہا ہے۔
