بالی ووڈ کے سپر اسٹار سلمان خان اور معروف اداکار سنجے دت کی کئی دہائیوں پر محیط دوستی ایک بار پھر سوشل میڈیا پر موضوعِ گفتگو بن گئی ہے۔ سلمان خان کی جانب سے اپنے قریبی دوست اور بڑے بھائی سمجھے جانے والے سنجے دت کے لیے شیئر کی گئی محبت بھری پوسٹ نے مداحوں کے دل جیت لیے ہیں۔
سلمان خان نے اپنے آفیشل انسٹاگرام اکاؤنٹ پر سنجے دت کے ساتھ حالیہ ملاقات کی چند خوبصورت تصاویر شیئر کیں، جن میں دونوں اداکار ایک دوسرے کو گرمجوشی سے گلے لگاتے ہوئے دکھائی دے رہے ہیں۔ رپورٹس کے مطابق یہ تصاویر سنجے دت کی رہائش گاہ پر لی گئی ہیں، جہاں دونوں نے خوشگوار وقت گزارا۔
تصاویر کے ساتھ سلمان خان نے ایک نہایت جذباتی کیپشن بھی تحریر کیا، جس میں انہوں نے سنجے دت کو اپنا بڑا بھائی قرار دیتے ہوئے ان کے لیے نیک تمناؤں کا اظہار کیا۔
View this post on Instagram
سلمان خان نے لکھا:
“بابا ہمیشہ بابا ہی رہتے ہیں، اور بابا، بابا ہوتا ہے۔ سنجو بابا ہم سب کے بابا ہیں اور اب اپنے بچوں کے بھی بابا ہیں۔ میرے بڑے بھائی سنجے دت، اللہ، بھگوان اور یسوع مسیح سب اس آدمی کو خوش رکھیں۔ آئی لو یو بابا۔”
یہ پیغام سامنے آتے ہی مداحوں نے سلمان خان کی اس محبت اور احترام کو بے حد سراہا۔ سوشل میڈیا پر ہزاروں صارفین نے دونوں اداکاروں کی دوستی کو بالی ووڈ کی مضبوط ترین دوستیوں میں سے ایک قرار دیا اور ان کی تصاویر پر محبت بھرے تبصرے کیے۔
سلمان خان اور سنجے دت نے ماضی میں متعدد فلموں میں ایک ساتھ کام کیا ہے، جبکہ دونوں کی آف اسکرین دوستی بھی ہمیشہ خبروں کی زینت بنتی رہی ہے۔ مشکل وقت ہو یا خوشیوں کا موقع، دونوں فنکار ایک دوسرے کے ساتھ کھڑے نظر آتے ہیں، جس کی وجہ سے مداح ان کی دوستی کو مثالی قرار دیتے ہیں۔
سلمان خان کی یہ حالیہ پوسٹ بھی اس بات کا ثبوت ہے کہ شہرت اور مصروفیات کے باوجود دونوں اداکاروں کے درمیان محبت، احترام اور اعتماد کا رشتہ آج بھی پہلے کی طرح مضبوط ہے۔ یہی وجہ ہے کہ ان کی یہ جذباتی پوسٹ چند ہی گھنٹوں میں سوشل میڈیا پر وائرل ہوگئی اور لاکھوں مداحوں نے اسے پسند کرتے ہوئے دونوں ستاروں کے لیے نیک خواہشات کا اظہار کیا۔
