فیصل آباد کے تھانہ ایئرپورٹ کے علاقے چک نمبر 250 عباس میں پرانی دشمنی اور مخبری کے شبہے پر 8 سے 10 مسلح افراد نے خانہ بدوشوں کی جھگیوں پر دھاوا بول کر اندھا دھند فائرنگ کر دی، جس کے نتیجے میں 8 سالہ معصوم بچی سمیت 3 خواتین موقع پر ہی جاں بحق ہو گئیں جبکہ ایک 3 سالہ بچی شدید زخمی ہو گئی। مسلح حملہ آور واردات کے بعد جائے وقوعہ سے ایک 15 سالہ لڑکے کو بھی مبینہ طور پر اغوا کر کے اپنے ساتھ فرار ہو گئے ہیں।
ریسکیو اور پولیس ذرائع کے مطابق حملہ آوروں کی جانب سے جھگیوں پر حملے کے دوران خواتین نے مزاحمت کی کوشش کی جس پر ملزمان نے سیدھی گولیاں برسا دیں۔ فائرنگ کے نتیجے میں 55 سالہ زبیدہ بی بی، 35 سالہ عاصمہ اور 8 سالہ مسکان موقع پر دم توڑ گئیں۔ فائرنگ کی زد میں آ کر 3 سالہ کمسن بچی کے چہرے پر گولی لگی جسے تشویشناک حالت میں فوری طبی امداد کے لیے الائیڈ اسپتال فیصل آباد منتقل کر دیا گیا ہے۔ ابتدائی تحقیقات کے مطابق حملہ آوروں کو شبہ تھا کہ قصور میں کچھ عرصہ قبل پولیس مقابلے میں ہلاک ہونے والے اپنے ساتھی کی مخبری ان خانہ بدوش افراد نے کی تھی۔
آئی جی پنجاب نے تہرے قتل کی اس وحشیانہ واردات کا فوری نوٹس لیتے ہوئے آر پی او فیصل آباد سے تفصیلی رپورٹ طلب کر لی ہے اور سی پی او فیصل آباد کو ملزمان کی فوری گرفتاری کا حکم دیا ہے۔ ترجمان پنجاب پولیس کے مطابق سینئر افسران اور فرانزک سائنس لیب کی ٹیموں نے جائے وقوعہ سے شواہد اور خالی خول تحویل میں لے لیے ہیں جبکہ مغوی لڑکے کی بازیابی اور ملزمان کے گھیراؤ کے لیے خصوصی چھاپہ مار ٹیمیں تشکیل دے دی گئی ہیں۔
