کراچی کے مختلف علاقوں نارتھ ناظم آباد، زمان ٹاؤن اور کورنگی میں فائرنگ کے الگ الگ واقعات پیش آئے ہیں جن کے نتیجے میں 2 کمسن بچیوں اور ایک خاتون سمیت مجموعی طور پر 5 افراد شدید زخمی ہو گئے۔ ریسکیو اور پولیس حکام کے مطابق تمام زخمیوں کو فوری طبی امداد کے لیے قریبی سرکاری ہسپتالوں منتقل کر دیا گیا ہے جبکہ پولیس نے جائے وقوعہ سے شواہد جمع کر کے قانونی کارروائی اور تفتیش کا باضابطہ آغاز کر دیا ہے۔
ترجمان کراچی پولیس کے مطابق پہلا واقعہ نارتھ ناظم آباد واحد کالونی میں اقراء یونیورسٹی کے قریب پیش آیا جہاں ڈکیتی میں مزاحمت پر مسلح ڈاکوؤں کی فائرنگ سے 56 سالہ سلیم ولد ابراہیم زخمی ہوئے، جنہیں عباسی شہید ہسپتال پہنچایا گیا۔ دوسرا واقعہ زمان ٹاؤن کے علاقے کورنگی ساڑھے 5 نمبر مین چوک کے قریب پیش آیا جہاں ذاتی رنجش کی بنا پر فائرنگ کے نتیجے میں 45 سالہ محمد نعیم ولد لال دین زخمی ہوئے، جنہیں جناح ہسپتال منتقل کر دیا گیا۔
اس کے علاوہ فائرنگ کا تیسرا اور پراسرار واقعہ کورنگی ناصر جمپ، ضیا کالونی میں ایک گھر کے اندر پیش آیا جہاں نامعلوم سمت سے آنے والی اندھی گولیوں کی زد میں آ کر 21 سالہ عمیرہ سردار، 10 سالہ بچی بشریٰ دختر وحید گل اور 12 سالہ عائشہ دختر محمد شریف خان زخمی ہو گئیں۔ تمام زخمی خواتین و بچیوں کو فوری طور پر جناح ہسپتال منتقل کیا گیا جہاں انہیں طبی امداد دی جا رہی ہے۔ متعلقہ تھانوں کی پولیس نے واقعات کے محرکات کا تعین کرنے کے لیے تحقیقات تیز کر دی ہیں۔
