لاہور (ویب ڈیسک) 2 جولائی 2026
صوبائی دارالحکومت لاہور کے علاقے شالیمار میں رشتوں اور چادر و چار دیواری کے تقدس کو پامال کرنے والا ایک اور انتہائی دل دہلا دینے والا واقعہ سامنے آیا ہے، جہاں ایک اوباش ملزم نے ایک معذور اور بے بس خاندان کے گھر کو آسان ہدف سمجھتے ہوئے رات کی تاریکی میں داخل ہو کر لڑکی کے ساتھ نازیبا حرکات کرنے کی گھناؤنی کوشش کی۔ تاہم، شالیمار پولیس نے مظلوم خاندان کی فریاد پر بجلی کی سی تیزی دکھاتے ہوئے محض چند ہی گھنٹوں کے اندر روپوش ملزم کو جدید ٹیکنالوجی کی مدد سے ٹریس کر کے دھر لیا اور اس کے منصوبے کو خاک میں ملا دیا۔
تفصیلات کے مطابق، یہ لرزہ خیز واقعہ شالیمار کے مقامی علاقے میں رات گئے پیش آیا، جہاں جمیل نامی ملزم دیوار پھاند کر متاثرہ لڑکی کے گھر کے اندر داخل ہو گیا۔ ملزم نے سوئی ہوئی لڑکی کو دبوچ کر اس کے ساتھ نازیبا حرکات اور دست درازی کرنے کی کوشش کی، جس پر لڑکی نے حواس قائم رکھتے ہوئے شدید مزاحمت کی اور زور زور سے چیخیں مارنا شروع کر دیں۔ معصوم لڑکی کی چیخ و پکار اور شور کی آوازیں سن کر گھر والے اور آس پاس کے محلے دار فوری طور پر جاگ اٹھے اور کمرے کی طرف دوڑے، جنہیں دیکھ کر ملزم جمیل ہڑبڑا کر اندھیرے کا فائدہ اٹھاتے ہوئے موقع سے فرار ہونے میں کامیاب ہو گیا۔
واقعے کے فوری بعد محلے داروں نے پولیس ہیلپ لائن پر اطلاع دی، جس پر شالیمار پولیس کی ٹیم فوری جائے وقوعہ پر پہنچ گئی۔ تفتیش کے دوران یہ افسوسناک انکشاف سامنے آیا کہ متاثرہ لڑکی کے والد سگے والد قوتِ سماعت (سننے) اور گویائی (بولنے) کی صلاحیت سے مکمل طور پر محروم ہیں۔ ملزم جمیل کو اس بات کا بخوبی علم تھا اور اس نے اسی مجبوری اور معذوری کا فائدہ اٹھا کر اس لاچار گھرانے کو اپنا آسان ہدف بنایا تھا۔ پولیس نے متاثرہ خاندان کی مدعیت میں ملزم کے خلاف سنگین دفعات کے تحت مقدمہ درج کر کے مختلف ٹیمیں روانہ کیں اور چند ہی گھنٹوں کے آپریشن کے بعد ملزم کو گرفتار کر لیا۔
ایس پی سول لائنز چوہدری اثر علی نے اس شرمناک واقعے کا سخت نوٹس لیتے ہوئے ملزم کی فوری گرفتاری پر شالیمار پولیس ٹیم کی کارکردگی کو داد دی اور ان کی پیشہ ورانہ صلاحیتوں کو سراہا۔ میڈیا سے گفتگو کرتے ہوئے انہوں نے دوٹوک الفاظ میں کہا کہ خواتین کا استحصال کرنے والے، معصوم بچیوں کی عزتوں پر ہاتھ ڈالنے والے اور معذور و بے بس شہریوں کو نشانہ بنانے والے درندہ صفت عناصر معاشرے کے لیے ناسور ہیں اور ایسے مجرمان کسی بھی قسم کی رعایت یا معافی کے مستحق نہیں ہیں۔ پولیس کا کہنا ہے کہ گرفتار ملزم سے مزید تفتیش جاری ہے اور اسے سخت قانونی سزا دلوائی جائے گی۔
