دنیا بھر میں استعمال ہونے والی انسٹنٹ میسجنگ ایپلی کیشن واٹس ایپ نے اپنے اینڈرائیڈ صارفین کے لیے ایک انتہائی کارآمد اور نیا فیچر متعارف کرانا شروع کر دیا ہے، جس کے تحت اب اسٹیٹس پوسٹ کرنے کے بعد بھی اس کا کیپشن ایڈٹ کیا جا سکے گا۔ ٹیکنالوجی میڈیا رپورٹس کے مطابق یہ جدید فیچر فی الحال اینڈرائیڈ کے واٹس ایپ بیٹا (Beta) ورژن 2.26.30.1 استعمال کرنے والے کچھ مخصوص صارفین کے لیے دستیاب ہے، جسے گوگل پلے اسٹور سے ڈاؤن لوڈ کیا جا سکتا ہے۔ کمپنی کا کہنا ہے کہ آنے والے چند ہفتوں کے دوران اس فیچر کو مرحلہ وار تمام اینڈرائیڈ اور آئی او ایس صارفین کے لیے باضابطہ طور پر فعال کر دیا جائے گا۔
اس سے قبل اگر کسی صارف سے اسٹیٹس کے کیپشن میں ٹائپنگ یا املا کی کوئی غلطی ہو جاتی تھی تو اسے پورا اسٹیٹس ڈیلیٹ کر کے دوبارہ اپ لوڈ کرنا پڑتا تھا جس سے کافی وقت ضائع ہوتا تھا۔ اس نئے فیچر کی آمد کے بعد اب صارفین کو اپنا اسٹیٹس ڈلیٹ کرنے کی بالکل ضرورت نہیں رہے گی اور وہ باآسانی شیئر کیے گئے اسٹیٹس پر جا کر کیپشن میں فوری ترمیم کر سکیں گے۔ واٹس ایپ انتظامیہ کا کہنا ہے کہ اس اقدام کا بنیادی مقصد صارفین کو معمولی غلطیوں کی تصحیح کی سہولت دینا اور ایپلی کیشن کے استعمال کے تجربے کو مزید آسان اور موثر بنانا ہے۔
کمپنی نے اس فیچر کے تحت کیپشن ایڈٹ کرنے کے دو انتہائی آسان طریقے متعارف کرائے ہیں۔ پہلا طریقہ یہ ہے کہ صارف اپنی اسٹیٹس لسٹ کے تھری ڈاٹ مینو میں جا کر ’ایڈٹ کیپشن‘ کا اپشن منتخب کر سکتا ہے، جبکہ دوسرا طریقہ اسٹیٹس دیکھتے وقت سکرین پر ہی ایک پنسل آئیکن کی صورت میں نظر آئے گا۔ اس آئیکن پر کلک کرتے ہی ایڈیٹنگ ونڈو کھل جائے گی جس سے اسٹیٹس سے باہر نکلے بغیر کیپشن تبدیل ہو جائے گا۔ واٹس ایپ کے اس نئے فیچر کو صارفین کی جانب سے بے حد سراہا جا رہا ہے کیونکہ اس سے وقت کی بچت اور پلیٹ فارم کی لچک میں اضافہ ہوگا۔
