ملزمہ انمول عرف پنکی کو قتل، منشیات اور اسلحہ کے 4 مختلف مقدمات میں عدالت میں پیش کیا جائے گا؛ لاہور کے تھانہ وحدت کالونی میں درج پرانا مقدمہ بھی منظرِ عام پر آگیا
کورٹ رپورٹر 15 مئی 2026
کراچی کی بدنام زمانہ منشیات فروش انمول عرف پنکی کی مشکلات میں مزید اضافہ ہو گیا ہے، جہاں ایک طرف ان کے خلاف مقدمات کی تعداد بڑھتی جا رہی ہے وہیں دوسری جانب پولیس تحویل میں ان کی طبیعت بھی ناساز ہو گئی ہے۔ ملزمہ کے وکیل میر ہدایت اللہ ایڈووکیٹ نے بغدادی اور درخشاں تھانوں میں درج مقدمات میں وکالت نامہ جمع کرواتے ہوئے عدالت سے استدعا کی ہے کہ ان کی موکلہ کو جسمانی ریمانڈ پر پولیس کے حوالے کرنے کے بجائے جیل (جوڈیشل ریمانڈ) بھیجا جائے۔ وکیل کا موقف ہے کہ ملزمہ کی طبیعت گزشتہ شب شدید بگڑ گئی تھی، اس لیے انہیں طبی بنیادوں پر ریلیف ملنا چاہیے۔
پولیس حکام آج ملزمہ کو جوڈیشل مجسٹریٹ جنوبی کی عدالت میں پیش کریں گے، جہاں قتل، منشیات اور غیر قانونی اسلحہ سمیت 4 مختلف مقدمات میں ان کے مزید جسمانی ریمانڈ کی استدعا کی جائے گی۔ پولیس کی جانب سے ملزمہ کے طبی معائنے کی رپورٹ اور اب تک کی تفتیشی پیش رفت بھی عدالت کے روبرو رکھی جائے گی۔ واضح رہے کہ پنکی کے خلاف تازہ ترین مقدمہ کراچی کے سچل تھانے میں درج کیا گیا ہے، جس سے ان کے خلاف قانونی گھیرا مزید تنگ ہوتا جا رہا ہے۔
دوسری جانب تفتیش کا دائرہ کراچی سے نکل کر لاہور تک پھیل گیا ہے، جہاں تھانہ وحدت کالونی میں 2024 میں درج ایک پرانا مقدمہ سامنے آیا ہے۔ پولیس ریکارڈ کے مطابق، اس وقت صابراں بی بی نامی ایک خاتون سے 20 گرام کوکین برآمد ہوئی تھی جس نے انکشاف کیا تھا کہ یہ منشیات اسے کراچی کی انمول (پنکی) نے فراہم کی تھی۔ حیران کن طور پر اس مقدمے میں اب تک پنکی کو اشتہاری قرار نہیں دیا گیا تھا، تاہم اب اس پرانے کیس کے کھرے بھی ملزمہ سے ملتے دکھائی دے رہے ہیں۔ پولیس ذرائع کا کہنا ہے کہ ملزمہ کے بین الصوبائی نیٹ ورک کے حوالے سے مزید اہم انکشافات متوقع ہیں۔
