دور دراز علاقوں سے مریضوں کی ہنگامی فضائی منتقلی ممکن ہوگی؛ جہاز میں نوزائیدہ بچوں کے لیے انکیوبیٹر اور جدید طبی آلات کی تنصیب
کراچی (علیم نواب خان سے)
پاکستان پیپلز پارٹی کے چیئرمین بلاول بھٹو زرداری نے بلوچستان کے عوام کے لیے ایک بڑے فلاحی منصوبے ‘پیپلز ایئر ایمبولینس’ کا باقاعدہ افتتاح کر دیا ہے۔ کوئٹہ میں منعقدہ افتتاحی تقریب کے دوران بتایا گیا کہ اس سروس کا بنیادی مقصد صوبے کے دور دراز اور دشوار گزار علاقوں میں رہنے والے شہریوں کو ہنگامی حالات میں فوری طبی امداد فراہم کرنا اور مریضوں کو بڑے شہروں کے ہسپتالوں تک بروقت منتقل کرنا ہے۔
پیپلز ایئر ایمبولینس کو جدید ترین طبی سہولیات سے لیس کیا گیا ہے، جس میں آکسیجن سسٹم، لائف مانیٹرنگ مشینیں اور دیگر ضروری آلات نصب کیے گئے ہیں تاکہ دورانِ پرواز مریض کی حالت مستحکم رکھی جا سکے۔ اس منصوبے کی ایک اہم خصوصیت نوزائیدہ بچوں کی بحفاظت منتقلی کے لیے خصوصی انکیوبیٹر کی فراہمی ہے، جو بلوچستان میں بچوں کی شرحِ اموات کم کرنے میں معاون ثابت ہوگی۔
بلاول بھٹو زرداری نے اس موقع پر گفتگو کرتے ہوئے کہا کہ بلوچستان کے عوام کو علاج معالجے کی بہترین سہولیات ان کی دہلیز پر فراہم کرنا ہماری ترجیح ہے۔ ایئر ایمبولینس کے آغاز سے اب پہاڑی اور ریگستانی علاقوں میں پھنسے مریضوں کو گھنٹوں طویل زمینی سفر کے بجائے چند منٹوں میں طبی امداد مل سکے گی۔ صوبائی حکومت کے اس اقدام کو عوامی و سماجی حلقوں کی جانب سے صحت کے شعبے میں ایک بڑا بریک تھرو قرار دیا جا رہا ہے۔
