بلاجیو بینکوئٹ میں پروقار تقریب؛ ڈپٹی کمشنر طحہٰ سلیم، ایس ایس پی ڈاکٹر عمران خان اور چیئرمین ہیپی پیلس گروپ محمد آصف خان سمیت اعلیٰ حکام کی آمد، ریٹائر ہونے والے پولیس افسر کو ’ذوالفقار‘ اور شیلڈ کا تحفہ پیش
کراچی (علیم نواب خان سے)
کراچی: سابق وفاقی وزیرِ پیٹرولیم اور پاکستان پیپلز پارٹی کے سینئر رہنما ڈاکٹر عاصم حسین کی جانب سے ریٹائر ہونے والے مقتدر پولیس افسر، ڈی ایس پی و ایس ڈی پی او خواجہ اجمیر نگری سلمان وحید کے اعزاز میں ایک پُر وقار اور شاندار الوداعی تقریب کا انعقاد کیا گیا۔ شہر کے مقامی “بلاجیو بینکوئٹ” میں منعقد ہونے والی اس باوقار تقریب میں سیاسی، سماجی، انتظامی اور تاجر برادری کی مقتدر شخصیات نے بہت بڑی تعداد میں شرکت کر کے سبکدوش ہونے والے افسر کی خدمات کو خراجِ تحسین پیش کیا۔
تقریب کی شاندار نظامت اور معزز مہمانوں کی آمد
اس اہم تقریب کی نظامت کے فرائض پی پی پی پی ایس 126 کے صدر اور ممبر سندھ کونسل حسن خان نے نہایت شاندار اور جاندار انداز میں انجام دیے۔ تقریب کے معزز مہمانوں میں ڈپٹی کمشنر (ڈی سی) ڈسٹرکٹ سینٹرل طحہٰ سلیم، ایس ایس پی سینٹرل ڈاکٹر عمران خان، اور ہیپی پیلس گروپ آف اسکولز اینڈ کالجز کے چیئرمین محمد آصف خان خصوصی طور پر شامل تھے۔
ان کے علاوہ تقریب میں پاکستان پیپلز پارٹی ڈسٹرکٹ سینٹرل کے صدر سردار خان، جنرل سیکریٹری شہزاد مجید، ممبر سندھ کونسل فیضان راوت، ڈی ایس پی نیو کراچی محمد ندیم، ڈی ایس پی لیاقت آباد محمد وسیم، ڈی ایس پی ناظم آباد نسیم صدیقی، سیکریٹری اطلاعات ڈسٹرکٹ سینٹرل اسد حنیف، میڈیا کوآرڈینیٹر لیبر ونگ سندھ حافظ احتشام احمد، ڈپٹی سیکریٹری اطلاعات سینٹرل ذیشان احمد، حمید وارثی، پی ایس کے سیکریٹری اطلاعات سعد یوسف سمیت ڈسٹرکٹ سینٹرل کے تمام ایس ایچ اوز (SHOs)، اسسٹنٹ کمشنرز اور سماجی رہنماؤں نے بھرپور شرکت کی۔
روایتی تحائف اور ’ذوالفقار‘ کی پیشکش
تقریب کے دوران ایک منفرد روایتی پیش رفت دیکھنے میں آئی، جہاں ہیپی پیلس گروپ کے چیئرمین محمد آصف خان اور صدر پی ایس 126 حسن خان کی جانب سے میزبانِ تقریب ڈاکٹر عاصم حسین اور ریٹائر ہونے والے ڈی ایس پی سلمان وحید کو عقیدت و احترام کے طور پر ’ذوالفقار‘ (تلوار) اور یادگاری شیلڈز پیش کی گئیں، جبکہ تقریب میں آنے والے دیگر تمام معزز مہمانوں کو سندھ دھرتی کی روایتی و ثقافتی پہچان “سندھی ٹوپی اور اجرک” کے تحائف پہنائے گئے۔
ڈی ایس پی سلمان وحید کی خدمات کو زبردست خراجِ تحسین
اس موقع پر خطاب کرتے ہوئے مقررین نے ڈی ایس پی سلمان وحید کی طویل اور بے داغ پیشہ ورانہ خدمات، ضلع وسطی (سینٹرل) میں امن و امان کے قیام، جرائم پیشہ عناصر کے خلاف کریک ڈاؤن اور بہترین عوامی روابط (Public Relations) کو زبردست الفاظ میں سراہا۔ مقررین کا کہنا تھا کہ سلمان وحید نے پولیس ڈپارٹمنٹ میں اپنی پوری سروس انتہائی دیانتداری، فرض شناسی اور قانون کی بالادستی کے تحت گزاری ہے، جسے ضلع کی عوام اور محکمہ ہمیشہ یاد رکھے گا۔
چیئرمین ہیپی پیلس گروپ محمد آصف خان کا خصوصی خطاب
تقریب کے اختتام پر گفتگو کرتے ہوئے ہیپی پیلس گروپ آف اسکولز اینڈ کالجز کے چیئرمین محمد آصف خان نے ریٹائر ہونے والے افسر کو گراں قدر الفاظ میں خراجِ تحسین پیش کرتے ہوئے کہا:
”کسی بھی سرکاری ملازم اور بالخصوص پولیس افسر کا عزت، احترام اور بے داغ ماضی کے ساتھ اپنی مدتِ ملازمت پوری کر کے رخصت ہونا ایک بہت بڑا اعزاز ہے۔ ڈی ایس پی سلمان وحید جیسے فرض شناس افسران نے ہمیشہ شہریوں کو تحفظ کا احساس دلایا اور شہر میں امن و امان کے فروغ کے لیے سول سوسائٹی اور تعلیمی اداروں کا بھرپور ساتھ دیا۔ انہوں نے جس طرح عوامی روابط کو مضبوط بنا کر پولیس اور عوام کے فاصلوں کو کم کیا، وہ دیگر افسران کے لیے بھی ایک بہترین مثال ہے۔ ہماری دعا ہے کہ ان کی ریٹائرمنٹ کے بعد کی زندگی بھی صحت، تندرستی اور کامیابیوں کے ساتھ گزرے۔“
عشائیے کے بعد میزبان ڈاکٹر عاصم حسین اور تمام شرکاء نے ڈی ایس پی سلمان وحید کو ان کی مستقبل کی زندگی کے لیے الوداع کہا اور نیک تمناؤں کا اظہار کیا۔
