کراچی (ویب ڈیسک) 16 جون 2026
وزیر صحت سندھ ڈاکٹر عذرا پیچوہو نے اسپتال کے واش روم میں خاتون کے ہاں بچے کی پیدائش کے افسوسناک واقعے پر اپنی تحقیقاتی رپورٹ جاری کر دی ہے۔ وزیر صحت نے طبی عملے کو غفلت کے الزامات سے بری الذمہ قرار دیتے ہوئے اس واقعے کا ذمہ دار متاثرہ فیملی کو ٹھہرایا ہے۔
وزیر صحت سندھ کے مطابق، انکوائری کمیٹی نے ابتدائی طور پر عملے کو قصوروار قرار دیا تھا، تاہم بعد ازاں صورتحال کا تفصیلی جائزہ لینے کے بعد یہ نتیجہ اخذ کیا گیا کہ اس میں ڈاکٹروں یا طبی عملے کی کوئی کوتاہی شامل نہیں تھی۔ ڈاکٹر عذرا پیچوہو نے موقف اختیار کیا کہ حاملہ خاتون خود بستر سے اٹھ کر واش روم گئیں، جہاں اچانک لیبر (دردِ زہ) شروع ہو گیا، جس کے باعث بچے کی پیدائش لیبر روم کے فرش پر ہوئی۔ وزیر صحت کا کہنا ہے کہ اس نوعیت کی پیدائش ہنگامی صورتحال میں کسی بھی جگہ ہو سکتی ہے اور اسے طبی غفلت نہیں کہا جا سکتا۔
اس کے علاوہ وزیر صحت نے لیبر روم میں غیر متعلقہ افراد کی موجودگی پر بھی تشویش کا اظہار کیا۔ انہوں نے بتایا کہ لیبر روم میں خاتون کے ساتھ موجود تیماردار مردوں نے طبی عملے کے ساتھ بدتمیزی کی تھی۔ ڈاکٹر عذرا پیچوہو نے واضح کیا کہ لیبر روم میں مردوں کا داخل ہونا مناسب نہیں ہوتا، اور یہ عمل طبی ماحول کے اصولوں کے منافی ہے۔اس بیان کے بعد واقعے کی نوعیت پر بحث مزید شدت اختیار کر گئی ہے، جہاں ایک طرف انتظامیہ ڈاکٹروں کو کلیئر قرار دے رہی ہے، وہیں دوسری طرف فیملی کی جانب سے شدید ردعمل کا سامنا ہے۔
