کراچی (ویب ڈیسک) — 13 جولائی 2026
پاکستان کو کیش لیس اور ڈیجیٹل معیشت بنانے کے لیے ایک بہت بڑا بریک تھرو سامنے آیا ہے۔ کراچی میں ہونے والے ایک اعلیٰ سطحی اجلاس میں عالمی ادائیگیوں کے سب سے بڑے نیٹ ورک ‘ماسٹر کارڈ’ (Mastercard) اور ‘بینک آف پنجاب’ (BOP) نے اپنے تزویراتی تعاون کو مزید وسعت دینے کا اعلان کر دیا ہے۔ اس اہم بیٹھک میں ماسٹر کارڈ کی ایگزیکٹو وائس پریزیڈنٹ پبلک سیکٹر، ایلش کیمبل کی سربراہی میں وفد نے شرکت کی جبکہ بینک آف پنجاب کی قیادت صدر اور سی ای او ظفر مسعود نے کی۔ اس شراکت داری کا بنیادی مقصد پاکستان میں روایتی کاغذی نوٹوں کے استعمال کو ختم کر کے ڈیجیٹل اور محفوظ ادائیگیوں کے نظام کو فروغ دینا ہے۔
اس اسٹریٹجک اتحاد کے تحت دونوں ادارے مل کر مالیاتی شمولیت، ٹرانزٹ ادائیگیوں، سرکاری فنڈز کی ڈیجیٹل منتقلی اور بیرون ملک سے آنے والی ترسیلاتِ زر (Remittances) کو جدید ترین ٹیکنالوجی سے لیس کریں گے۔ اب عام صارفین، دکانداروں، تاجروں اور سرکاری اداروں کو کارڈز، ای کامرس اور کانٹیکٹ لیس ٹیکنالوجی کے ذریعے جوڑا جائے گا۔ اجلاس میں اس بات پر بھی اطمینان کا اظہار کیا گیا کہ اس اشتراک سے حکومت پنجاب کے فلیگ شپ منصوبوں جیسے کہ ‘وزیر اعلیٰ پنجاب آسان کاروبار کارڈ’، ‘کیسان کارڈ’ اور ‘لائیوسٹاک کارڈ’ کے ذریعے صوبے بھر کے کسانوں اور چھوٹے کاروباری افراد تک شفاف اور محفوظ طریقے سے مالی امداد پہنچائی جا رہی ہے۔ اس کے علاوہ ‘رمضان نگہبان پروگرام’ کے تحت بھی ڈیجیٹل کارڈز کے ذریعے مستحقین تک شفاف امداد پہنچائی گئی جس سے کیش پر انحصار کم ہوا۔
سب سے انقلابی قدم پنجاب کے 13 بڑے شہروں میں ٹرانسپورٹ کے نظام کو ڈیجیٹل کرنا ہے۔ ماسٹر کارڈ اور بینک آف پنجاب مل کر صوبے کے سب سے بڑے ٹرانزٹ پروگرام پر کام کر رہے ہیں جس کے بعد مسافر اپنے بینک کارڈز کو استعمال کرتے ہوئے بسوں اور میٹرو میں سفر کا کرایہ سیکنڈوں میں ادا کر سکیں گے۔ اس موقع پر بینک آف پنجاب کے سی ای او ظفر مسعود کا کہنا تھا کہ ماسٹر کارڈ کے ساتھ ہمارا تعاون معاشی ترقی اور حکومتی خدمات کی فراہمی میں گیم چینجر ثابت ہوا ہے، اور ہم مستقبل میں کیش لیس اکانومی کے لیے مزید جدید حل متعارف کرواتے رہیں گے۔ دوسری طرف ایلش کیمبل نے کہا کہ پاکستان جس تیزی سے ڈیجیٹل مستقبل کی طرف بڑھ رہا ہے، ماسٹر کارڈ اس سفر میں بی او پی کے ساتھ مل کر ملکی معیشت کو مضبوط بنانے کے لیے پرعزم ہے۔
