پاکستان کی آئی ٹی اور ڈیجیٹل معیشت کی تاریخ میں ایک تاریخی پیش رفت سامنے آئی ہے، جہاں دنیا کی سب سے بڑی ٹیکنالوجی کمپنی “گوگل” نے پاکستان میں اپنا پہلا باضابطہ دفتر قائم کر دیا ہے جس کا افتتاح وزیراعظم شہباز شریف نے گوگل کے پبلک پالیسی کے نائب صدر ولسن وائٹ اور اسلام آباد میں امریکی ناظم الامور نٹالی بیکر کے ہمراہ کیا۔ وزیراعظم آفس سے جاری اعلامیے کے مطابق اس موقع پر گوگل کے 9 رکنی اعلیٰ سطحی وفد نے وزیراعظم سے ملاقات کی جس میں پاکستان کے “ڈیجیٹل نیشن” وژن، معیشت کی ڈیجیٹلائزیشن اور قومی ڈیجیٹل ایکو سسٹم کی تعمیر کے لیے باہمی تعاون کو حتمی شکل دی گئی۔
وزیراعظم شہباز شریف نے گوگل کے اس تاریخی فیصلے کا خیرمقدم کرتے ہوئے کہا کہ اس اقدام سے پاکستان میں عالمی ٹیکنالوجی کمپنیوں کے اعتماد میں اضافہ ہوگا اور نوجوانوں کے لیے روزگار و مہارتوں کے نئے مواقع پیدا ہوں گے۔ وزیراعظم نے وفد کو نوجوانوں کے لیے آئی ٹی اور مصنوعی ذہانت (AI) کے تربیتی منصوبوں پر بریفنگ دی اور اس بات پر زور دیا کہ پاکستان میں گوگل کی براہِ راست موجودگی سے وسیع پیمانے پر ڈیجیٹل اسکلز پروگراموں کو آگے بڑھایا جا سکے گا۔ انہوں نے ڈیجیٹل معیشت کے فروغ اور ہزاروں باصلاحیت نوجوانوں کو خود روزگار فراہم کرنے پر گوگل کے کردار کو سراہا۔
گوگل کے وفد کے سربراہ ولسن وائٹ نے پاکستان کی نوجوان نسل کی بے پناہ صلاحیتوں کا اعتراف کرتے ہوئے بتایا کہ مقامی دفتر قائم ہونے سے ڈیجیٹل تبدیلی کی رفتار تیز ہوگی اور پاکستانی اسٹارٹ اپس و مقامی کاروباروں کو عالمی مارکیٹ تک رسائی ملے گی۔ انہوں نے پاکستان میں گوگل کے اشتراک سے قائم کردہ کروم بک اسمبلی لائن کے منصوبے کو سراہتے ہوئے کہا کہ یہاں اسمبل ہونے والی کروم بکس کو خطے کے دیگر ممالک میں برآمد کرنے کے روشن امکانات موجود ہیں۔ تقریب کے اختتام پر وزیراعظم شہباز شریف اور معزز مہمانوں نے باضابطہ طور پر نقاب کشائی کر کے گوگل کے نئے دفتر کا افتتاح کیا۔
