ممبئی (ویب ڈیسک) 16 جون 2026
بھارتی ٹیلی ویژن انڈسٹری کی ابھرتی ہوئی نوجوان اداکارہ سنچیتا اوگلے کی پراسرار موت کے بعد تحقیقات میں ایک نیا موڑ آ گیا ہے۔ اداکارہ کے بھائی آکاش اوگلے کی جانب سے دیے گئے حالیہ بیانات نے اس واقعے کو ایک معمہ بنا دیا ہے، جس میں آنجہانی اداکار سشانت سنگھ راجپوت کا ذکر بھی شامل ہو گیا ہے۔
اداکارہ کے بھائی آکاش اوگلے نے اپنی بہن کی موت کو محض ایک عام خودکشی ماننے سے انکار کر دیا ہے۔ ان کا کہنا ہے کہ سنچیتا ایک ذہنی طور پر مضبوط لڑکی تھیں، اس لیے یہ یقین کرنا مشکل ہے کہ انہوں نے اتنی آسانی سے اپنی زندگی ختم کر لی۔ آکاش نے مطالبہ کیا ہے کہ انڈسٹری کے اندر موجود دباؤ اور ان حالات کی شفاف تحقیقات کی جائیں جس نے ان کی بہن کو شدید ذہنی کشمکش میں مبتلا کیا۔
اس کیس میں سب سے حیران کن پہلو تاریخ کا مماثل ہونا ہے۔ 14 جون کو سشانت سنگھ راجپوت کی برسی ہوتی ہے، اور اسی تاریخ کو سنچیتا بھی اپنے کمرے میں مردہ پائی گئیں۔ آکاش اوگلے کے مطابق سنچیتا اپنی موت سے کچھ دن قبل مسلسل سشانت سنگھ راجپوت کا ذکر کر رہی تھیں۔ ان کی آخری انسٹاگرام پوسٹ یعنی ایک ریل بھی سشانت سنگھ راجپوت کی برسی سے متعلق تھی، جس پر لکھا تھا کہ پھر 14 جون آ گئی۔ آکاش اس تاریخ کی مماثلت کو محض اتفاق نہیں مانتے اور ان کے نزدیک اس کے پیچھے کوئی گہرا پیغام یا محرک موجود ہو سکتا ہے۔
پولیس حکام کا کہنا ہے کہ کیس کے تمام پہلوؤں کا باریک بینی سے جائزہ لیا جا رہا ہے۔ ابتدائی اطلاعات کے مطابق واقعہ کے وقت اداکارہ گھر میں تنہا تھیں اور ان کے اہلِ خانہ کے واپس آنے پر لاش ملی۔ فی الحال پولیس کسی بھی حتمی نتیجے پر پہنچنے سے گریز کر رہی ہے اور تحقیقات مکمل ہونے کا انتظار کر رہی ہے۔
سنچیتا اوگلے بھارتی ٹی وی انڈسٹری کا ایک جانا پہچانا چہرہ تھیں اور انہوں نے کئی مقبول ڈراموں میں اداکاری کے جوہر دکھائے تھے۔ ان کے مشہور کرداروں میں کم کم بھاگیہ میں دیا ٹنڈن کا کردار، واگلے کی دنیا میں روچیتا جیٹلی کا کردار اور دل والی دلہا لے جائے گی میں مرکزی کردار شامل ہیں، جس نے انہیں شہرت کی بلندیوں پر پہنچایا تھا۔سنچیتا کی اچانک موت نے ان کے مداحوں اور ساتھی فنکاروں کو صدمے میں مبتلا کر دیا ہے۔ ان کے بھائی کے بیانات کے بعد، اب شوبز انڈسٹری کے اندر موجود دباؤ اور اس طرح کے واقعات کی تحقیقات کے مطالبے نے زور پکڑ لیا ہے۔
