فیصل قریشی کی شاندار فنی خدمات پر خراج تحسین، پاکستان رومانیہ بزنس کونسل کی مؤثر نمائندگی اور شرکت بھی نمایاں رہی
عاطف فاروقی کا خطاب، ثقافتی شعبہ عالمی روابط مضبوط بنانے میں کلیدی کردار ادا کرتا ہے اور اہمیت اجاگر کی گئی
سہیل شمیم فرپو کی شرکت، پاکستان رومانیہ تعلقات میں ثقافتی ہم آہنگی اور باہمی تعاون کو مزید فروغ دینے پر زور دیا
لائف اسٹائل جرنلسٹس ایسوسی ایشن کی کامیاب میزبانی، فنکاروں اور میڈیا شخصیات کی بھرپور شرکت نے تقریب کو یادگار بنا دیا
کراچی (علیم نواب خان سے )آرٹس کونسل کے آڈیٹوریم نمبر ایک میں منعقد ہونے والی ایک پروقار تقریب میں پاکستان کے معروف ٹی وی اور فلم اسٹار فیصل قریشی کو ان کی شاندار فنی خدمات کے اعتراف میں زبردست خراج تحسین پیش کیا گیا۔ اس باوقار تقریب کا انعقاد لائف اسٹائل جرنلسٹس ایسوسی ایشن کی جانب سے کیا گیا، جس میں شوبز، میڈیا اور مختلف شعبہ ہائے زندگی سے تعلق رکھنے والی اہم شخصیات نے شرکت کی۔
تقریب میں پاکستان رومانیہ بزنس کونسل (PRBC) کی نمائندگی چیئرمین سہیل شمیم فرپو اور ایڈوائزر و چیف آپریٹنگ آفیسر عاطف فاروقی نے کی۔ انہوں نے دیگر مہمانوں کے ہمراہ فیصل قریشی کی فنی خدمات کو سراہا اور ان کی کامیابیوں کو پاکستان کے لیے باعث فخر قرار دیا۔ شرکاء نے اس موقع پر فیصل قریشی کے ڈرامہ اور فلمی کیریئر کو سراہتے ہوئے انہیں پاکستانی انٹرٹینمنٹ انڈسٹری کا ایک درخشاں ستارہ قرار دیا۔
تقریب سے خطاب کرتے ہوئے عاطف فاروقی نے کہا کہ ثقافتی مہارت اور تخلیقی صنعتیں عالمی سطح پر ممالک کے درمیان تعلقات کو مضبوط بنانے میں اہم کردار ادا کرتی ہیں۔ انہوں نے کہا کہ اس طرح کی تقریبات نہ صرف ہمارے قومی ٹیلنٹ کو سراہنے کا موقع فراہم کرتی ہیں بلکہ یہ عوامی سطح پر روابط کو فروغ دینے کا ذریعہ بھی بنتی ہیں، جس سے پاکستان اور رومانیہ کے درمیان تعلقات مزید مستحکم ہوتے ہیں۔
انہوں نے مزید کہا کہ ثقافتی سفارتکاری آج کے دور میں سافٹ پاور کا ایک اہم ستون بن چکی ہے، جس کے ذریعے ممالک اپنی شناخت، روایات اور تخلیقی صلاحیتوں کو عالمی سطح پر متعارف کراتے ہیں۔ پاکستان رومانیہ بزنس کونسل اس حوالے سے مسلسل کوششیں کر رہی ہے تاکہ دونوں ممالک کے درمیان ثقافتی تبادلے کو فروغ دیا جا سکے۔
چیئرمین سہیل شمیم فرپو نے بھی اس موقع پر اپنے خیالات کا اظہار کرتے ہوئے کہا کہ فن اور ثقافت وہ زبان ہیں جو سرحدوں سے بالاتر ہو کر دلوں کو جوڑتی ہیں۔ انہوں نے اس بات پر زور دیا کہ پاکستان کے فنکار عالمی سطح پر اپنی صلاحیتوں کا لوہا منوا رہے ہیں، جو ملک کی مثبت شناخت کو اجاگر کرنے میں مددگار ثابت ہو رہا ہے۔
تقریب کے منتظمین، لائف اسٹائل جرنلسٹس ایسوسی ایشن کو بھی اس شاندار ایونٹ کے انعقاد پر بھرپور خراج تحسین پیش کیا گیا۔ مقررین نے کہا کہ ایسی تقریبات نہ صرف فنکاروں کی حوصلہ افزائی کرتی ہیں بلکہ معاشرے میں مثبت سرگرمیوں کو فروغ دینے کا ذریعہ بھی بنتی ہیں۔
آخر میں پاکستان رومانیہ بزنس کونسل نے فیصل قریشی کو ان کے کامیاب اور متاثر کن کیریئر پر مبارکباد پیش کرتے ہوئے نیک تمناؤں کا اظہار کیا اور اس عزم کا اعادہ کیا کہ مستقبل میں بھی ثقافتی سرگرمیوں کے ذریعے بین الاقوامی روابط کو مزید مضبوط بنایا جائے گا۔
