کامیڈی کے سلطان رؤف لالہ اور شکیل صدیقی کی جوڑی عیدِ قرباں پر دھمال مچانے کے لیے تیار؛ اوپن ایئر تھیٹر میں پیش کیے جانے والے کھیل کی تحریر رؤف لالہ اور ہدایات یونس میمن کی ہیں
رپورٹ: وسیم خان
کراچی: عید الاضحیٰ کے پُر مسرت موقع پر شہریوں کو ہنسانے اور تفریح فراہم کرنے کے لیے کراچی آرٹس کونسل میں تیاریاں عروج پر پہنچ گئی ہیں۔ عیدِ قرباں کے سب سے بڑے اور فیملی اسٹیج تھیٹر ڈرامے ”بکرا پیٹرول پہ“ کے ایک خصوصی اور روایتی گانے (ٹائٹل سونگ) کی شوٹنگ مکمل کر لی گئی ہے، جس میں ڈرامے کی پوری کاسٹ نے رنگ برنگے ملبوسات میں بھرپور حصہ لیا۔
جدید طنز و مزاح سے بھرپور اس تھیٹر کھیل کی روزانہ کی بنیاد پر ریہرسل کراچی آرٹس کونسل کے اوپن ایئر تھیٹر میں جاری ہے۔ کامیڈی کی دنیا کے بے تاج بادشاہ اور سلطان رؤف لالہ اور شکیل صدیقی کی مقتدر جوڑی اس عید پر کراچی کے شہریوں کے لیے ایک بڑا سرپرائز اور دھمال مچانے کے لیے تیار ہے۔ یہ ڈرامہ عید الاضحیٰ کے پہلے روز سے آرٹس کونسل کے اوپن ایئر تھیٹر میں لائیو پیش کیا جائے گا۔
ڈرامے کی ٹیم اور کاسٹ کی تفصیلات
اس ہائی پروفائل کامیڈی ڈرامے کے ڈائریکٹر نامور ڈائریکٹر یونس میمن ہیں، جبکہ اس کی کہانی خود رؤف لالہ کے قلم سے تحریر کردہ ہے، جس میں پیٹرول کی قیمتوں اور عید پر بکرے کے نخروں کو مزاحیہ انداز میں جوڑا گیا ہے۔ ڈرامے کے پروڈیوسرز اسد اللہ اور امان اللہ ہیں، جنہوں نے ڈرامے کو شاندار بنانے کے لیے تمام وسائل فراہم کیے ہیں۔ اسسٹنٹ ڈائریکٹر کے فرائض عامر ہوکلا انجام دے رہے ہیں جبکہ گانے اور ڈرامے کی مسحور کن موسیقی مجتبیٰ نقوی نے ترتیب دی ہے۔
اسپیشل عید پلے کی کاسٹ میں پاکستان تھیٹر انڈسٹری کے نامور ستاروں کی ایک کہکشاں شامل ہے، جن میں:
شکیل صدیقی اور رؤف لالہ
شانزے، عامر ریمبو اور مہک نور
عبداللہ لالہ، شہباز صنم اور شرابیل صدیقی
ناصر خان، شبیر بھٹی اور زوہیب صنم
پریا خان، طاہرہ خان اور جیند میمن
ارما احمد، ناصر جہاں زیب اور زوہیب ریمبو
فائزہ خان، حسین راٹھور اور شہزاد لالہ شامل ہیں۔
شوٹنگ کے موقع پر گفتگو کرتے ہوئے شکیل صدیقی اور رؤف لالہ کا کہنا تھا کہ طویل عرصے بعد کراچی کی عوام کو اسٹیج پر معیاری، صاف ستھرا اور فیملی کلچر سے ہم آہنگ مزاح دیکھنے کو ملے گا۔ پروڈیوسرز اور ڈائریکٹر یونس میمن نے امید ظاہر کی ہے کہ مہنگائی کے دور میں یہ ڈرامہ شہریوں کے چہروں پر مسکراہٹیں بکھیرنے میں اہم کردار ادا کرے گا۔
