مسلسل محنت، اداکاری میں ندرت اور نظم و ضبط نے سپنا غزل کو کراچی تھیٹر کی سب سے قابلِ اعتماد اداکارہ بنا دیا؛ حنیف راجہ کے ساتھ پھر سے جوڑی جمانے کے لیے پرعزم
رپورٹ: وسیم خان | کراچی
کراچی تھیٹر اور ٹیلی ویژن کی ابھرتی ہوئی اور ورسٹائل فنکارہ سپنا غزل اس وقت اپنے فنی کیریئر کے سنہری دور سے گزر رہی ہیں۔ اپنی شاندار اداکاری، مکالموں کی ادائیگی میں مہارت اور کردار کی گہرائی میں اتر جانے کی صلاحیت نے انہیں فنونِ لطیفہ کے حلقوں میں ایک منفرد مقام عطا کیا ہے۔ سپنا غزل پچھلے چھ سالوں سے کراچی کے اسٹیج پر مسلسل پاور فل پرفارمنس دے کر اپنی صلاحیتوں کا لوہا منوا چکی ہیں، جس نے یہ ثابت کر دیا ہے کہ وہ محض کامیڈی تک محدود نہیں، بلکہ سنجیدہ اور جذباتی کرداروں کو بھی انتہائی مہارت سے نبھانے کی ملکہ رکھتی ہیں۔
عید الاضحیٰ پر ”برگر بکرے“ کا تحفہ
عید الاضحیٰ کے پرمسرت موقع پر سپنا غزل ایک بار پھر اپنے مداحوں کے دل جیتنے کے لیے تیار ہیں۔ وہ معروف رائٹر و ایکٹر حنیف راجہ کے تحریر کردہ کامیڈی کھیل ”برگر بکرے“ میں ایک نہایت اہم اور مرکزی کردار ادا کرتی نظر آئیں گی۔ یہ ڈرامہ عید الاضحیٰ پر کراچی آرٹس کونسل میں پیش کیا جائے گا، جہاں حنیف راجہ اور سپنا غزل کی مقبول جوڑی ایک بار پھر اسٹیج پر دھوم مچانے کے لیے تیار ہے۔ مداح ان کی اس نئی پیشکش کا شدت سے انتظار کر رہے ہیں۔ٹیلی ویژن پر بھی کامیابیوں کا سفر.سپنا غزل کا سفر صرف تھیٹر تک محدود نہیں، بلکہ وہ ٹی وی ڈراموں میں بھی اپنی اداکاری کے جوہر دکھا رہی ہیں۔ ان کی پیشہ ورانہ وقت کی پابندی اور کردار میں جان ڈالنے کی خوبی کے باعث ڈرامہ پروڈیوسرز اور ہدایت کاروں کی پہلی پسند بن چکی ہیں۔ ایک ہی وقت میں تھیٹر کی ریہرسلز، اسٹیج شوز اور ٹی وی کی شوٹنگز کو ساتھ لے کر چلنا کوئی آسان کام نہیں، لیکن سپنا غزل نے اپنی محنت اور نظم و ضبط سے یہ توازن شاندار طریقے سے برقرار رکھا ہوا ہے۔کام کے لیے وقف، آرام کو ثانوی ترجیح.قریبی حلقوں کا کہنا ہے کہ سپنا غزل اپنی صحت سے زیادہ اپنے کام اور کمیٹمنٹ کو اولیت دیتی ہیں۔ ان کا ماننا ہے کہ ایک اداکارہ ہونے کے ناطے اپنی ذمہ داریوں کو پورا کرنا ان کی اولین ترجیح ہے۔ اسی انتھک محنت کے باعث ان کی مصروفیات میں روز بروز اضافہ ہوتا جا رہا ہے۔ خود سپنا غزل کا اس حوالے سے کہنا ہے:”میں ہر نئے کردار کو ایک چیلنج سمجھ کر قبول کرتی ہوں اور ہمیشہ میری کوشش ہوتی ہے کہ اپنے ناظرین کو پچھلے کردار سے بہتر اور منفرد پرفارمنس پیش کروں۔“مداحوں کی محبت، مسلسل مواقع اور کردار نگاری میں ندرت نے سپنا غزل کے قسمت کے ستارے کو عروج پر پہنچا دیا ہے۔ عید الاضحیٰ پر آرٹس کونسل میں پیش ہونے والا یہ نیا کھیل اس بات کا ثبوت ہوگا کہ وہ کراچی تھیٹر کی سب سے قابلِ اعتماد اور ورسٹائل اداکاراؤں کی فہرست میں نمایاں پوزیشن پر فائز ہیں۔
