سابق وفاقی وزیر نے ملکی سلامتی اور قدرتی آفات میں پاک فوج کے غیر معمولی کردار کو سراہا؛ اوورسیز پاکستانیوں کی بڑی تعداد میں شرکت
لندن (رپورٹ : احسن علیم نواب ، اسپیشل کوررسپونڈنٹ)
برطانیہ کے دارالحکومت لندن میں پاکستان کے سابق وفاقی وزیرِ خزانہ اور ممتاز معیشت دان مفتاح اسماعیل کے اعزاز میں ایک پُر وقار اور پرکشش تقریب کا انعقاد کیا گیا، جس میں اوورسیز پاکستانیوں، کاروباری شخصیات اور مختلف شعبہ ہائے زندگی سے تعلق رکھنے والے معززین نے بڑی تعداد میں شرکت کی۔ اس تقریب کے دوران سابق وزیرِ خزانہ نے پاکستان کی موجودہ معاشی و سیاسی صورتحال پر روشنی ڈالنے کے ساتھ ساتھ پاکستان آرمی کی ملک و قوم کے لیے پیش کی جانے والی قربانیوں کو شاندار الفاظ میں خراجِ تحسین پیش کیا۔
تقریب سے خطاب کرتے ہوئے مفتاح اسماعیل کا کہنا تھا کہ پاک فوج نے ہمیشہ ملکی دفاع اور جغرافیائی سلامتی کو یقینی بنانے کے لیے لازوال قربانیاں دی ہیں۔ انہوں نے کہا کہ دہشت گردی کے خلاف جنگ ہو، ملکی سرحدوں کی حفاظت یا پھر سیلاب اور زلزلوں جیسی قدرتی آفات میں عوام کی داد رسی، پاک فوج کے افسران اور جوانوں نے ہمیشہ صفِ اول میں رہ کر قوم کی خدمت کی ہے جس پر پوری قوم کو فخر ہے۔
سابق وزیرِ خزانہ نے اوورسیز پاکستانیوں پر زور دیا کہ وہ پاکستان کی ترقی اور استحکام کے لیے اپنا مثبت کردار ادا کرتے رہیں۔ انہوں نے واضح کیا کہ ایک مضبوط اور مستحکم پاکستان کے لیے معاشی اصلاحات کے ساتھ ساتھ ریاستی اداروں کا مضبوط ہونا اور ان کا باہمی تعاون ناگزیر ہے۔
مفتاح اسماعیل کے اعزاز میں منعقدہ اس تقریب کے شرکاء نے ان کی معاشی بصیرت اور دوراندیشی کو سراہتے ہوئے کہا کہ مشکل ترین معاشی حالات میں ان کے لیے گئے فیصلے ملکی معیشت کو سنبھالا دینے میں مددگار ثابت ہوئے تھے۔ تقریب کے اختتام پر منتظمین کی جانب سے مفتاح اسماعیل کو یادگاری شیلڈ بھی پیش کی گئی۔
